молитвенник, сборник молитв, молитвы на каждый день, молитвы против недугов, это должен знать каждый, православная литература, архив mp3, редкие молитвы, православные посты, просьбы о помощи, vjkbndtyybr, ghfdjckfdbt, православие

» » Акафист трем Оптинских братиям на Пасху убиенным иеромонаху Василию, иноку Ферапонту, иноку Трофиму

Акафист трем Оптинских братиям на Пасху убиенным иеромонаху Василию, иноку Ферапонту, иноку Трофиму

Акафист трем Оптинских братиям на Пасху убиенным



Акафист трем Оптинских братиям на Пасху убиенным иеромонаху Василию, иноку Ферапонту, иноку Трофиму



Кондак 1


Избранным сыном старцев Оптинских, Святыя Троицы тричисленным служителям, агнцем закланным на Пасху Господню и дерзновение добропобедное улучившим, похвальная принесем пения; вы же воздвигните нас от гробов нерадения, с любовию вам зовущих:

Радуйтеся, трие новомученицы Оптинстии, Христа Воскресшего проповедницы.



Икос 1


Ангельскому житию подражати желающе, подвигом мученическим в обители Оптинстей присияли есте, жизнь свою за Христа отдавше, ныне же в невечернем дни Царствия Божия с мучениками ликовствующе, услышите нас, помощи просящих и в молитве к вам вопиющих:

Радуйтеся, радости Воскресения провозвестницы;

Радуйтеся, Оптинских старцев наследницы.

Радуйтеся, благодати Божия сосуди избраннии;

Радуйтеся, златокованыя трубы Пасхальная.

Радуйтеся, ранами своими демонов уязвившии;

Радуйтеся, трезвоном Пасхальным диавола оглушившии.

Радуйтеся, венценосцы Великопостнического поприща;

Радуйтеся, знаменоносцы Пасхального Агнца.

Радуйтеся, меченосное небес прехождение;

Радуйтеся, Крестовоскресныя славы явление.

Радуйтеся, трие новомученицы Оптинстии, Христа Воскресшаго проповедницы.



Кондак 2


Троица Всеблагая и Благопромыслительная от различных концев земли русския собра вас, отцы преподобнии, в обитель Оптинскую, еже прославити вы в лице мучеников тричисленных, на Пасху убиенных, да единеми усты поете песть трегубо песнославимую: Аллилуия.



Икос 2


Христа Воскресшего сретити всем сердцем возжделевше, инаго жития, кроме иноческого не пожелали есте, первии насельницы возрождающияся пустыни явистеся, трудами многими себе смиряюще и страсти умершвляюще, подвигом своим стену неразоримую обители Оптинстей созиждили есте, сего ради благодарственно воспеваем вам сице:

Радуйтеся, на ниве Христове поработати прошедшии;

Радуйтеся, ралом страданий землю серца возделавшии.

Радуйтеся, житием старцев Оптинских себе назидавшии;

Радуйтеся, равноангельную жизнь достигнути возжелавшии.

Радуйтеся, служб церковных рачительние молитвенницы;

Радуйтеся, трудолюбия неленостние подвижницы.

Радуйтеся, яко вертоград оптинских украшаете цветами нетления;

Радуйтеся, яко гробницу вашу зиждите, яко Кувуклию Воскрения.

Радуйтеся, светозарнии лучи восходящия Пасхи;

Радуйтеся, блаженнии причастницы Христовы Страсти.

Радуйтеся, трие новомученицы Оптинстии, Христа Воскресшаго проповедницы.



Кондак 3


Во обитель древнюю пришедше, у могил Оптинских старцев молилися есте, да укреплени будете узким путем шествовати; просвещени же бывше Духом Святым, мир сей оставили есте, и горняго Отечества достигнути желающе, воспели благодартсвенную песнь Богу: Аллилуия.



Икос 3


Имеюще в сердцах своих благое желание работати Господеви, ревностно вооружистеся противу мира, диавола и страстей, подвигом иноческим себе предасте, от силы возрастающе в силу; сему вашему доброму житию внимающе, благодарственно вам вопием:

Радуйтеся, рачителие теплого покаяния;

Радуйтеся, искоренителие хладнаго отчаяния.

Радуйтеся, мертволепное страстей умерщвление;

Радуйтеся, живоносное добродетелей процветение.

Радуйтеся, на Пасху Господню умрети желавшии;

Радуйтеся, смертию смерть во Христе поправшии.

Радуйтеся, блаженнии участницы первого Воскресения;

Радуйтеся, благопричастницы нескончаемого веселия.

Радуйтеся, яка таланты, от Бога вам данныя, в землю не сокрывшии;

Радуйтеся, яко гробы ваша сокровищем нетления обогатившии.

Радуйтеся, трие новомученицы Оптинстии, Христа Воскресшаго проповедницы.



Кондак 4


Вся суетная и ложная в мире временнем познасте, на рало руки ваша возложисте, яко истиннии возделователи нивы Христовы; трудом иноческим себе предали есте, молитву и подвиги не яве, но тайно творяще, не человеческия славы взыскующе, но славы Божия песнь хвалебную поюще Богу. Аллилуия.



Икос 4


Житием старческим обитель святая прославленная, безбожники же разоренная, иноческим житием паки процвете и от разорения и пепла воздвижеся, венцем же новомученическим ныне венчается и красотами страстотерпческими украшается, сего ради восхваляем вас сице:

Радуйтеся, обетов монашеских печати златозарнии;

Радуйтеся, веры православныя адаманти троеграннии.

Радуйтеся, в невидимей брани иноцы непоколебимии;

Радуйтеся, оружницы Христовы непреоборимии.

Радуйтеся, души ваша на всякую скорбь уготовившии;

Радуйтеся, телеса ваша в жертву живую представившии.

Радуйтеся, преподобномучеников оптинских преемственная славо;

Радуйтеся, новомучеников русских предивная доброто.

Радуйтеся, яко серпом страдания пожати бысте в богоизбранныя класы;

Радуйтеся, яко угобзисте Оптинскую ниву новомученическую летораслию.

Радуйтеся, трие новомученицы Оптинстии, Христа Воскресшаго проповедницы.



Кондак 5


Житие свое по завету старцев Оптинских между страхом и надеждою проводившии, о Царствии Небеснем и муках адских выну помышлявшии, непрелестный путь иноческаго делания обрели есте. Темже, яко сынове света, вопиете Солнцу Правды Христу, разорившему греховную тьму: Аллилуия.



Икос 5


Блаженную жизнь избрасте, преподобнии отцы, еже житии братии вкупе в дому Божием, в обитель Оптинскую вселилися есте, обаче горних обителей достигнути желающе, по лествице добродетелей восхождение в сердцах своих положисте. Темже яко евангельских блаженств достигших, ублажаем вас сице:

Радуйтеся, нищету духовную возлюбившии;

Радуйтеся, слезами одежду души убелившии.

Радуйтеся, земли кротких наследницы;

Радуйтеся, правды Христовы споспешницы.

Радуйтеся, помилование улучившии жизни жертвенныя;

Радуйтеся, Богозрители ради чистоты сердечныя.

Радуйтеся, яко брань страстей наших умиротворяете;

Радуйтеся, яко миром сим гонимии, Небо населяете.

Радуйтеся, стяжавшии Царство Небесное;

Радуйтеся, возшедшии в Радость Воскресшаго.

Радуйтеся, трие новомученицы Оптинстии, Христа Воскресшаго проповедницы.



Кондак 6


Трудами многими почестей в мире достигл еси, отче Василие, и тщету уразумев славы человеческия, воли Божия исполнителем соделался еси, и таланты тебе Богом данныя преумножил еси, проповедию и духовными стихами, яко старец Варсонофий, к покаянию народ русский призывал еси, научая воспевати Богу: Аллилуия.



Икос 6


Ведый, яко пастыртсво есть сугубое со Христом сораспятие, взем крест последовал еси Христу, и многим ищущим утешения пастырем добрым явился еси, врачуя души благодатию Божией; мы же тебе и двоице иноков, яко агнцам твоего мученического стада, воспеваем сице:

Радуйтеся, жезлом креста диавола поразившии;

Радуйтеся, свирелию ваших молитв паству возвеселившии.

Радуйтеся, священником похвало и иноком утверждение;

Радуйтеся, преподобных красото и мучеников укрепление.

Радуйтеся, треплетенная верве нелицемернаго братолюбия;

Радуйтеся, тристолпное основание непрелестнаго боголюбия.

Радуйтеся, яко у ваших гробов души наша оживляются;

Радуйтеся, яко вашим предстательством страсти наша умертвляются.

Радуйтеся, древних мучеников подражателие;

Радуйтеся, новомучеников равностоятелие.

Радуйтеся, трие новомученицы Оптинстии, Христа Воскресшаго проповедницы.



Кондак 7


Вся красная мира сего ни во что же вменив, кротостию и молчаливостию украсился еси, отче Ферапонте, сего ради в покаяние, яко в ризу спасения облеклся и в Оптину пустынь к подвигом духовным устремился еси, и от Господа венец мученический прияти сподобился еси, благодарно поя Богу: Аллилуия.



Икос 7


Житию святых потщался еси подражати, отче Ферапонте, постничеством и бдением, яко щитом, оградился еси, молитвою же Иисусовою, яко духовным мечем, непрестанно во уме вращаемым, главу змия сокрушил еси и победоносным воином Христовым явился еси, сего ради скорым помощником тебе в молитве призывающим являешися. Прими же с братиями-мучениками твоими благодарственныя сия хвалы:

Радуйтеся, яко предобручистеся Христу иноческим житием;

Радуйтеся, яко предочистилися есте молитвою и постом.

Радуйтеся, пажить Оптинскую мученическую кровию удобрившии;

Радуйтеся, ваиями Пасхальнаго ликования сию украсившии.

Радуйтеся, трие отрасли лозы Христовы страданьми процветшии;

Радуйтеся, от духовнаго точила вино умиления изведшии.

Радуйтеся, на свещнице Божественнем возженнии светильницы;

Радуйтеся, на тверди Церковней трисиянии мученицы.

Радуйтеся, имиже иночестии чини утверждаются;

Радуйтеся, имиже души верных укрепляются.

Радуйтеся, трие новомученицы Оптинстии, Христа Воскресшаго проповедницы.



Кондак 8


Ко Творцу Всяческих любовию воспламенився, во всех человецех, отче Трофиме, образ Божий выну зрети сподобился еси, сего ради в поте лица твоего трудился еси на благо ближняго, милосердием и состраданием виноградник сердца твоего украшая и в радость Господеви вызывая: Аллилуия.



Икос 8


Ревную поревновал еси, отче Трофиме, о еже стяжати сердце милости исполненное, сего ради не студен, а горящ быв на дела Божия и теплохладность душевную отринул еси. За таковое твое духовное рачение прославляем тя с пострадавшими братиями и благодарственно воспеваем вам сице:

Радуйтеся, яко церковную красоту созидаете;

Радуйтеся, яко мирскую суету упраздняете.

Радуйтеся, Оптины пустыни живожертвенное заколение;

Радуйтеся, Христу подражательное в ребра прободение.

Радуйтеся, лампады неугасимыя бдений непрестанных;

Радуйтеся, кадильницы благовонныя молитвословий сладких.

Радуйтеся, постнического попища крини присноцветущии;

Радуйтеся, Пасхальные радости реки приснотекущии.

Радуйтеся, яко духовным веселием нас напаяете;

Радуйтеся, яко печаль мирскую изсушаете.

Радуйтеся, трие новомученицы Оптинстии, Христа Воскресшаго проповедницы.



Кондак 9


Звонари искуснии, Ферапонте и Трофиме, радость Воскресения Христова миру благовествующе, яко созревшии снопы пожатии бысте, и от трудов земных вкупе с отцем Василием в житницу Небесную угобзилися есте, и яко сладкий хлеб Троице Святей принесостеся, песнь воспевающе: Аллилуия.



Икос 9


Делом познасте, яко любы жертвенна есть, темже Христу сораспялися есте, мечем закалаемии, и кровию своею не токмо души своя убелили, но и наша сердца окамененныя умягчили есте, сего ради с любовию воспеваем вам сице:

Радуйтеся, звонницы монастырския незримое украшение;

Радуйтеся, монашеского любомудрия сладкогласное песнопение.

Радуйтеся, криле голубине псаломски стяжавшии;

Радуйтеся, на горы боговедения теми возлетевшии.

Радуйтеся, о Страданиих Господних выну помышлявшии;

Радуйтеся, за Тридневно Воскресшаго триедино умершии.

Радуйтеся, мученичесою кровию своею омывшиися;

Радуйтеся, в виссон праведности велелепно одевшиися.

Радуйтеся, смерти давшии Пасхальное целование;

Радуйтеся, доставившии врагу множество рыданий.

Радуйтеся, трие новомученицы Оптинстии, Христа Воскресшаго проповедницы.



Кондак 10


Посещения преподобного Амвросия сподобивыйся, отче Василие, да укреплен будеши пред искушением великим, выю свою Гоподеви преклонил еси, глаголя: – мне на Пасху умрети вожделенно есть – и на заклание вкупе с Ферапонтом и Трофимом последовал еси, воспевая Богу: Аллилуия.



Икос 10


Лоза Истинная израсти вас, яко гроздие сладчайшии в вертограде Оптинстем, отцы всечестнии Василие, Ферапонте и Трофиме; Кровию Божественную напоеннии, в ребра богоненавистно прободеннии, в страдании вашем изгнетаете, яко от точила, струи Божественнаго радования, утешающе всех вопиющих к вам таковая:

Радуйтеся, Оптинского луга райское прозябение;

Радуйтеся, аромати богоприятнии молитвы и умиления.

Радуйтеся, соты хранящии умную сладость;

Радуйтеся, облацы крапящии неземную радость.

Радуйтеся, чаши исполненныя иноческого плача;

Радуйтеся, фиалы радостворной по Бозе печали.

Радуйтеся, сердечнаго вертограда цветник неувядаемый;

Радуйтеся, Иисусовы молитвы источник богознаемый.

Радуйтеся, имиже сладость добродетелей воспевается;

Радуйтеся, имиже горечь скорбей истребляется.

Радуйтеся, трие новомученицы Оптинстии, Христа Воскресшаго проповедницы.



Кондак 11


Древний змий, ненавистию к роду человеческому разжигаемый, потщася вас умертвити, благовестников Воскресения Христова, отцы богоноснии, аще и сосуды плоти вашея растерза, обаче жало злобы своея токмо притупи, душ же ваших не возможе уловите, песнь победную Воскресшему Христу поющих: Аллилуия.



Икос 11


Пустынь Оптинскую ныне святолепно украшаете, телесы же нетленными воскресение мертвых возвещаете, новомученицы Оптинстии Василие, Ферапонте и Трофиме, главу змия, уязвившаго вас, веселыми ногами сотросте и в Горнее праздновати вечную Пасху востекли есте; посетите ны, грешныя, вашею молитвою, и от злобы диавола избавите воспевающия вам сицевая:

Радуйтеся, Горняго Иерусалима насельнцы;

Радуйтеся, христокраснии Пасхальнии трисвещницы.

Радуйтеся, сынове Оптинских старцев избрании;

Радуйтеся, Церкви Христовы чада благонравнии.

Радуйтеся, трисветлая высото молитвеннаго восхождения;

Радуйтеся, трилюбезная глубинно иноческого уединения.

Радуйтеся, кладези исполненнии духовными дарованиями;

Радуйтеся, струи играющия пасхальными радованиями.

Радуйтеся, яко чудес делателище часовня ваша явися;

Радуйтеся, яко в нетленную сладость гроби ваша претворишася.

Радуйтеся, трие новомученицы Оптинстии, Христа Воскресшаго проповедницы.



Кондак 12


Благодать Божию обильно на вас излиянную сведуще, яко и по смерти не престаете источати чудеса от гробов ваших, темже молим вас яко проповедников Воскресения Христова: оживите нас умершвленных душею, да возставше от сна греховнаго в радости духовней взываем Христу Воскресителю мертвых: Аллилуия.



Икос 12


Поюще и славяще ваше богоугодное житие и мученическую смерть Христа ради, ведаем, яко аще и множество сложили быхом песнопений, не довольно будет восхвалити вся славная и великая, яже Господь в вас прославивыйся сотвори, но яко благодарная чада во умилении сердец вопием к вам таковая:

Радуйтеся, яко Умертвившемуся за всех соумираете;

Радуйтеся, яко со Воскресшим Христом совоскресаете.

Радуйтеся, нощи Пасхальныя светоноснии Ангели;

Радуйтеся, Великосубботняго покоя невозмутимии стражи.

Радуйтеся, яко стрелы лукавого далече от нас отгоняете;

Радуйтеся, яко копием ваших молитв бесов поражаете.

Радуйтеся, в сонме мученичестем за нас предстоятелие;

Радуйтеся, в соборе Оптинских святых ближнии о нас ходатаи.

Радуйтеся, имиже от гробов нерадения возставляемся;

Радуйтеся, имиже благодатию воскресения предозаряемся.

Радуйтеся, трие новомученицы Оптинстии, Христа Воскресшаго проповедницы.



Кондак 13


О, триблаженнии новомученицы Оптинстии Василие, Ферапонте и Трофиме, яко агнцы на Пасху заклании и в радость вечную ко Христу вшедшии, испросите нам у Господа страстей умершвление и добродетелей оживление, Христови сраспятися и с Ним совоскреснути и сподобитися вкупе с вами воспевати песнь Триединому Богу: Аллилуия.

Сей кондак глаголи трижды, затем икос 1-й и кондак 1-й.



Молитва первая


О, преславнии новомученицы Оптинстии Василие, Ферапонте и Трофиме, Оптины пустыни трисиянное украшение! Вы от ночи безверия во свет Христовы веры призвани бысте. В Оптину пустынь, яко к заре восходящей притекли есте, и тамо, яко елени жаждущии, от изобильных источников учений старческих напоилися есте, слезами покаяния землю сердца омывше, подвижническия плоды Подателю Воды Живыя принесли есте. Вы, яко работники единонадесятаго часа, в вердоград старчества пришедше, мир отвергли и страстей умерщвлением себе живопогребли есте и в краткое время сладкий плод мученичества возделали.

Ныне же во свете Воскресшаго Христа ликующе, испросите нам: серца в милости люботруднаго, хранения ума в целомудрии, в вере утверждения и духовного рачения, да возставше от гробов нерадения, воспоем и прославим тридневно возставшаго от гроба Христа Жизнодавца ныне и присно и во веки веков. Аминь.



Молитва вторая


О, тричисленнии преподобномученицы Оптинстии Василие, Ферапонте и Трофиме, Христа Воскресшаго добропобеднии поборницы! Вы, яко агнцы, заклании бысте в день Пасхи Господней и самих себе в жертву живую Святей Троице принесосте, в обители Оптинстей у гробов старческих упасостеся и учением их, яко сладким былием, вскормлени бысте. Услышите нас ныне у ваших гробов предстоящих и вашим подвигом озаряемых. Испросите у Воскресшаго Христа страстей наших умерщвление и ревности по Бозе оживление.

Вы за мученический подвиг свой нетленными венцами десницею Христовою венчастеся, яко страсти Его сопричастницы бысте, отонудуже и радости Воскресения Его общницы явистеся. Мы же в страстех безчестия погребеннии и путами многоразличных грехов связуемии, вне Чертого Брачнаго обретаемся и радости Вечери Пасхальнаго Агнца, увы, лишаемся. Но с теплою молитвою к вам обращаемся яко ко старшим братиям и дерзновенным предстателем нашим. Умолите Христа Бога нашего притупити смерти жало – греховные страсти наша и низпослати в сердца наша, яко в Кувуклию, Огнь победоносныя радости Воскресения Христова, да объятии пламенем сим возможем препобедити греховную тьму настоящего века и светоносно исповедати Христа Воскресшаго, всегда, ныне и присно и до скончания века. Аминь.



Тропарь, глас 3


Подобен: Да возвеселятся небесная:

Да веселятся иноческая воинства, / да радуется старцев Оптинских собрание, / яко на Пасху добропобеднии агнцы / в Оптиной заклашася, / иже язвами своими уязвиша демонская воинства, / и мучителево посрамившее рачение, / меченосно в райская села вселишася, / идеже молятся Христу Богу / спастися душам нашим.



Кондак, глас 3


Подобен: Аще и во гроб снишел еси:

Аще и во гробы снизшли есте на Пасху, / но небо души ваша прияло есть, / и воскресосте со Христом, яко Его ради умертвистеся, / и адову посрамисте власть. / Темже на браке Агнчем ликуете, / всерадостную воспевающе песнь: / Христос Воскресе из мертвых, / падшим подаяй воскресение.



Величание:


Величаем Вас, / святии преподобномученицы Оптинстии / Василие, Ферапонте и Трофиме, / и чтим честная страдания Ваша, / яже за Христа / претерпели есте.




Нашли ошибку? Выделите её и нажмите Ctrl+Enter      Версия для печати   Сообщить об ошибке  


Может быть интересным



Реклама


Реклама


Информация
Посетители, находящиеся в группе Гости, не могут оставлять комментарии к данной публикации.

управление размером текста

Α + Увеличить | α - Уменьшить

разделы сайта

обратите внимание

ThePrayerBook.info - Молитвенник НЕ доступен по адресу pb.pe !!! ThePrayerBook.info - Молитвенник НЕ имеет отношения к pb.pe

Ищем соавторов для ведения сайта

опрос

Обращаете ли Вы внимание, к какому патриархату относится храм?

Все опросы

Реклама